گزشتہ دنوں برطانوی بحری بیڑہ ایک امریکی فوجی بندرگاہ پر پہنچا جہاں برطانوی نیوی اہلکاروں کے منشیات کے لازمی ٹیسٹ کیے گئے تو ایسا ہولناک انکشاف ہوا کہ سن کر ہی اوسان خطا ہو جائیں۔ میل آن لائن کے مطابق اس برطانوی بحری بیڑے پر 16ایٹمی میزائل بھی موجود تھے اورایک ایٹمی آبدوز بھی اس بیڑے کے ساتھ تھی۔ ٹیسٹ کے نتائج میں معلوم ہوا کہ اس ایٹمی آبدوز پر موجود 3برطانوی بحریہ کے اہلکار راستے میں کوکین کا نشہ کرتے رہے تھے۔
رپورٹ کے مطابق یہ 15ہزار 900ٹن وزنی ایچ ایم ایس وینجنس نامی برطانوی بحری بیڑہ امریکی ریاست فلوریڈا کے ساحل پر واقع امریکی فوج کی بندرگاہ پر پہنچا تھا، جہاں تمام اہلکاروں کے پیشاب کے نمونے لے کر ٹیسٹ کیے گئے۔ اس بیڑے پر ایٹمی آبدوزبھی تھی جو انتہائی خفیہ آپریشنز میں استعمال کی جاتی ہے۔ جب ایچ ایم ایس ویجنس واپس سکاٹ لینڈ کی فوجی بندرگاہ پر پہنچا تو ان تینوں اہلکاروں کو بیڑے سے ہٹا دیا گیا اور انتہائی حساس مشن کے دوران منشیات استعمال کرنے کے الزام کے تحت ان کے خلاف محکمانہ کارروائی شروع کر دی گئی ہے۔واضح رہے کہ اس بحری بیڑے پر 16ٹریڈنٹ ایٹمی میزائل تھے جو ساڑھے 7ہزار میل کے فاصلے تک ہدف کو نشانہ بنا سکتے ہیں کروڑوں لوگ ان سے لقمہ اجل بن سکتے ہیں۔
