اوسلو( عقیل قادر) اوسلو میں مسلم سینٹر مور ٹنس رُد (Muslim center Mortensrud) کے زیر اہتمام فیملیز کے لیے سالانہ چیرٹی ڈنر (Charity dinner) کا اہتمام کیا گیا جس میں بڑی تعداد میں اوسلو اور گردو نواح سے خواتین و حضرات نے بھرپور شرکت کی۔چیرٹی ڈنر میں زندگی کے تمام شعبہ ہائے جات سے تعلق رکھنے والے لوگوں نے شرکت کی جن میں علمائے کرام، سیاستدان، بزنس کمیونٹی، فلاحی اور سماجی تنظیمات کے نمائندگان شامل ہیں۔تقریب کا آغاز تلاوت کلام پاک سے کیا گیا اور نعت رسول مقبول ﷺ عالمی شہرت یافتہ نعت خواں سید زبیب مسعود شاہ نے پیش کی جبکہ خصوصی خطاب پاکستان سے تشریف لائے ہوئے نامور عالم دین پیرزادہ محمد رضا ثاقب مصطفائی نے کیا اسکے علاوہ برمنگھم برطانیہ سے تشریف لائے ہوئے معروف عالم دین علامہ حافظ محمد فاروق چشتی اور ناروے میں پاکستانی سفیر محترمہ رفعت مسعود نے بھی خطاب کیا۔ تقریب کا مقصد مسلم سینٹر مورٹنس رُد کے ز یز نگرانی زیر تعمیر مسجد کے لیے ڈونیشن اکھٹا کرنی تھی جس میں ناروے کے مسلمانوں نے بڑھ چڑھ کر حصہ لیا اور صرف آدھے گھنٹے میں پانچ ملین کراؤن سے زائد رقم اکھٹی ہوئی۔ تقریب میں تین خوش نصیبوں کے لیے عمرہ کے ٹکٹ کی قرعہ انداز ی بھی کی گئی ۔ مسلم سینٹر مورٹنس رُد کا سنگ بنیاد پچھلے سال رکھا گیا جس کی تعمیر کے دو مراحل پر بیس ملین کراؤن خرچ ہو چکے ہیں۔ پلان کے مطابق مسجد کی تعمیر جون 2016 میں مکمل ہو گی اور اس پر ٹوٹل 45 ملین کراؤن خرچ ہوں گے۔ نامور عالم دین پیرزادہ محمد رضا ثاقب مصطفائی نے دنیا نیوز سے خصوصی گفتگو کرتے ہوئے کہا کہ نوجوان نسل کو محبت رسول ﷺ کا پیغام دینا مقصود تھادیار غیر میں رہنے والے مسلمانوں میں رسول اللہ ﷺ کی محبت موجود ہے اور وہ ان سے ٹوٹ کر محبت کرتے ہیں۔ برطانیہ سے تشریف لائے ہوئے علامہ حافظ محمد فاروق چشتی نے نئی مسجد کے لیے فنڈریزنگ کی تفصیلات بتاتے ہوئے کہا کہ آدھے گھنٹے میں پانچ ملین کراؤن سے زائد رقم جمع ہوئی جو اوسلو کے غیور مسلمانوں کے جذبہ ایمانی کا منہ بولتا ثبوت ہے ۔ عالمی شہرت یافتہ نعت خواں سید زبیب مسعود شاہ نے بھی دنیا نیوز سے گفتگو کرتے ہوئے کہا ناروے میں نوجوان نسل میں عشق رسولﷺ دیکھ کر اچھا لگا اور اسی عشق رسول ﷺ سے محفل میں رونق پیدا ہوتی ہے۔مسلم سینٹر مورٹنس رُد کے صدر طاہر محمود سلام اور نائب صدر اقبال راجہ نے تمام شرکاء کا شکریہ ادا کیا جبکہ دعا پیر سید یوسف بخاری نے کرائی۔
