افغان صوبے قندھار کے پولیس ہیڈ کوارٹر پر مسلح افراد کے حملے کے نتیجے میں 12 افراد ہلاک اور 60 زخمی ہوگئے ہیں، حملے کی ذمہ داری تحریک طالبان افغانستان نے قبول کی ہے ۔
افغان میڈیا کے مطابق قندھار پولیس ہیڈ کوارٹر پر حملے میں 7 عام شہری اور 5 پولیس اہلکار ہلاک ہوئے ہیں۔ ہسپتال ذرائع کا کہنا ہے کہ طالبان کے حملے میں 60 افراد زخمی ہوئے ہیں جن میں 40 پولیس اہلکار شامل ہیں۔
افغانستان کے مقامی وقت کے مطابق جمعرات کو شام 4 بج کر 40 منٹ پر اس وقت حملہ شروع ہوا جب ایک کار بم دھماکے کے بعد مسلح افراد پولیس ہیڈ کوارٹرز میں داخل ہوگئے۔ طالبان جنگجوﺅں اور افغان سکیورٹی فورسز میں 2 گھنٹے سے زائد مقابلہ جاری رہا اور 7 بجے ہیڈ کوارٹر کو کلیئر کرایا گیا ۔
افغان صدر اشرف غنی نے اپنے ایک بیان میں کہا ہے کہ افغانستان کی حکومت ملک میں امن کے راستے تلاش کر رہی ہے لیکن اس طرح کے حملوں کے ذریعے طالبان یہ ثابت کر رہے ہیں کہ وہ ملک میں امن نہیں چاہتے۔
