ممبرا میں عظیم الشان اعزازی مشاعرہ

مورخہ ۱۳ اپریل ۲۰۲۵ء بروز اتوار بمقام شریفہ روڈ ممبرا تھانہ (ممبئی) خامہ ادبی فورم باشتراک پیام شاعر، معراج احمد معراجؔ صاحب کی ممبئی آمد پر ایک شاندار اعزازی مشاعرے کا انعقاد کیا گیا، جس کی صدارت بھیونڈی سے آئے مہمان محترم خلیق الزماں نصرتؔ صاحب کے ذمہ رہی اور محترم مسعود حساسؔ صاحب (مقیم حال کویت) نے نظامت کی باگ ڈور سنبھالی۔ موصوف کی عمدہ نظامت نے مشاعرے کو مزید باوقار بنادیا۔
پروگرام کے ابتدائی مرحلے میں اعزازی کارکردگی عمل میں آئی جس کی تفصیل یہ ہے کہ محترم فخرعالم صاحب نے ناظمِ مشاعرہ محترم مسعود حساسؔ صاحب کی شال پوشی کی اس کے بعد محترم شمیم دانشؔ صاحب نے صدر مشاعرہ عالی جناب خلیق الزماں نصرتؔ کی شال پوشی کرکے اعزاز بخشا۔ اس کے بعد ایازؔ بستوی صاحب نے صاحبِ اعزاز معراج احمد معراجؔ صاحب کی شال پوشی کے ساتھ گلدستہ بھی ان کی خدمت میں پیش کیا اور مومنؔ ہندیؔ صاحب نے تینوں مہمانوں کے ناموں سے آراستہ عمدہ اور خوبصورت قلم کا ہدیہ پیش کیا۔ یہ بھی قابل ذکر ہے کہ مشاعرے کی اصل انتظامی کارکردگی میں جناب حکم چند اصغرؔ کوٹھاری، جناب مومنؔ ہندیؔ، جناب ایازؔ بستوی اور فخرعالم اعظمی صاحب نے حصہ لیا۔
تلاوتِ قرآن اور نعتِ پاک کے بعد باضابطہ غزل کا دور شروع ہوا اور مشاعرہ بڑی آب وتاب کے ساتھ ساڑھے دس بجے رات تک چلتا رہا اور سامعین داد و تحسین سے نوازتے رہے۔ لیجئے شعرائے کرام کے منتخب اشعار پیش خدمت ہیں۔

کل وہی سمندر کے حکمراں ہوں ممکن ہے
اوس چاٹ کر اپنی پیاس جو بجھاتے ہیں
صدرِ مشاعرہ خلیق الزماں نصرتؔ
۔۔۔۔۔۔۔۔۔۔۔۔۔۔۔۔
خیال وخواب کا سارا جہان ٹوٹ گیا
لگا جو سنگ حقیقت گمان ٹوٹ گیا
مہمانِ اعزازی معراج احمد معراجؔ
۔۔۔۔۔۔۔۔۔۔۔۔۔۔
ادب میں کس نے یہاں کیسے زندگی پائی
بہت ضروری ہے اس کا محاسبہ کرنا
زبیرؔ گورکھپوری
۔۔۔۔۔۔۔۔۔۔۔۔۔۔۔۔۔۔۔
اے وحشتِ حیات کہیں اور جاکے مر
میں جسم مستعار سے آگے نکل گیا
ناظمِ مشاعرہ مسعود حساسؔ
۔۔۔۔۔۔۔۔۔۔۔۔۔۔۔۔
سیج پر دلہن کی صورت کررہا ہوں انتظار
کب قضا آکر اٹھائے گی حجابِ زندگی
سلیم رشکؔ
۔۔۔۔۔۔۔۔۔۔۔۔۔۔۔۔۔۔۔۔۔۔
چلو اذان پکاریں ،چلو نماز پڑھیں
کوئی جہاد کا نعرہ نہ دے خدا کے لئے
عمرؔ فراہی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تم اسے منزلِ مقصود سمجھ بیٹھے ہو
ہم نے اس دہر کو آغاز سفر جانا ہے
شمیم دانشؔ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دیکھنے جاؤ تو یہ زیست ہے لمحوں کا سفر
جینے جاؤ تو یہ صدیوں میں بسر ہوتی ہے
زید واقفؔ بستوی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ملے گا کون جو شانہ کرے گا پیش اسے
میں سوچتا ہوں وہ کس کو پکڑکے روئے گا
مسیح الدین نذیریؔ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بتاتا ہے تجھے داڑھی کا تنکا
تری آنکھوں کا وہ تنکا ابھی تک
ایازؔ بستوی
۔۔۔۔۔۔۔۔۔۔۔۔۔۔۔۔۔۔۔۔
چپقلش، رنجش، حسد، کینہ، عداوت ،ردوکد
بڑھ گئیں اہلِ ادب میں ہم زباں ہونے کے بعد
مومنؔ ہندیؔ
۔۔۔۔۔۔۔۔۔۔۔۔۔۔۔۔۔۔
کوئی ملال بھی تیری قسم نہیں ہوتا
روا سلام ہی رکھتے تو غم نہیں ہوتا
منظرؔ بلیاوی
۔۔۔۔۔۔۔۔۔۔۔۔۔۔۔۔۔۔۔۔۔۔
چراغ ہم نے جلائے تھے روشنی کے لئے
وہی چراغ اگر بجھ گیا تو کیا ہوگا
توفیقؔ فاخری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نہ جانے کب کوئی بھوکا فقیر آجائے
بچا کے روٹیاں کچھ اپنے مرتبان میں رکھ
فخر عالمؔ اعظمی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شامل ہیں گر نکاح میں چاہت کی خوشبوئیں
کر کے نکاح پھول سے خوشبو کشید کر
تابشؔ رامپوری
۔۔۔۔۔۔۔۔۔۔۔۔۔۔۔۔۔۔۔
کیوں زمانہ مجھے بھلا بیٹھا
کیا میں حصہ نہیں زمانے کا
رفیقؔ چوگلے
۔۔۔۔۔۔۔۔۔۔۔۔۔۔۔۔۔۔
سیکھ جاؤ گے زندگی جینا
سیرتِ مصطفٰے پڑھو پیارے
ساحلؔ بستوی

آخر میں خطبۂ صدارت ختم ہوتے ہی مومنؔ ہندیؔ صاحب نے تمام حاضرین کا تہ دل سے شکریہ ادا کرکے پروگرام کے اختتام