محترم قارئین
ایک تازہ غزل آپ کے ذوق مطالعہ کی نذر !
مخلص- احمد ندیم رفیع
غزل
ڈاکٹر احمد ندیم رفیع
کوئی آتا کوئی جاتا دیکھا
عمر بھر ایک تماشا دیکھا
زندگی خاک میں رُلتی دیکھی
آسماں رنگ بدلتا دیکھا
لیلیِٰ حُسن پہ کیا کیا گزری
غیرتِ قیس نے کیا کیا دیکھا
سفَرِ شوق کی رُوداد نہ پوچھ
کبھی صحرا ، کبھی دریا دیکھا
ایک فرزانہ سرِ راہِ وفا
کبھی روتا ، کبھی ہنستا دیکھا
ساقیا ! تیرے کرم کے با وصف
ہر طلب گار کو پیاسا دیکھا
لبِ خنداں پہ کلی کا جوبن
چشمِ حیراں میں ستارہ دیکھا
جانےکس حال میں دیکھا تجھکو
پھر کوئی اور نہ تجھ سا دیکھا
ایک چلمن کہ ذرا سی سرکی
ایک چہرہ کہ ذرا سا دیکھا
جھیل میں عکس پڑا جب تیرا
چاند نے اپنا سراپا دیکھا
کُھل گیا دفترِ اشعار ندیم
جب کوئی حرف شناسا دیکھا
احمد ندیم رفیع
