قلمکار: نینا ملک
رُوحِ مَن!
ہماری صورتیں دیواروں سے مت مٹانا
ہم سوئے ہوئے خواب ہیں۔۔۔۔۔۔۔۔
جو تمہیں قدیم پتھروں کے نیچے پڑے ملیں گے
موت ہمیں مل کر جدا ہو چکی ہے۔۔۔۔۔
ہم غموں،تکلیفوں اور افسوس کی
تمام حدوں کو چھو چکے ہیں۔۔
اس سے آگے محض اب خوشی کا ٹھکانہ ہے
ہم کسی بھی لمحے جاگ سکتے ہیں
دیواروں پر پڑی گرد کے پیچھے بنی
تصویروں سے باہر
آسکتے ہیں۔۔۔
غاروں،جنگلوں،بیابانوں
اور گہرے سمندروں کی تہوں میں
بسی بستیوں میں
شاعروں کے لکھے قدیم نغموں میں
موسیقی کی کلا میں
طوائف کے رقص کرتے قدموں میں
پاؤں میں بندھے گھنگروں سے
نکلتی ہوئی
چھم۔۔۔۔چھم۔۔۔۔چھنن۔۔۔۔چھن۔۔۔۔چھم
کی آواز میں
کوٹھے کی سب سے تاریک کوٹھری میں پڑی
طوائف کی سیاہ چادر کی
پھٹی ہوئی درزوں سے نکلے ہوئے
دھاگوں سے بندھے ہوئے طبلوں سے نکلتی ہوئی
تاتھئی۔۔۔۔۔تاتاتھئی۔۔۔۔تاتاتھئی۔۔۔۔تھا۔۔
کی دھنوں میں ہم موجود ہیں۔۔۔۔۔۔
سو ہمیں دیواروں سے مت مٹانا۔۔۔۔
ہم ہی ہیں جو شاید
تمہارے آنے والی نسلوں کےلئے
وارث کی لکھی ہوئی ہیر کی داستاں کےجیسے
کسی کتاب میں لکھے ملیں گے۔۔۔
ہم صدی کے آخری وہ لوگ ہیں
جو بلھے کو رقص سکھاتی طوائف کی
عزت کرنا جانتے ہیں
سو ہماری صورتیں دیواروں سے مت مٹانا۔۔۔
ہم تمہارے بچوں کی لوک کہانیاں ہیں۔۔۔۔
سو ہمیں دیواروں سے مت مٹانا۔۔۔۔
