تبلیغی جماعت کے سابق امیر حاجی عبدالوہابؒ کو آہوں اور سسکیوں میں سپرد خاک کیا جاچکا ہے۔ ان کے انتقال کی خبر ملتے ہی پاکستان سمیت دنیا بھر سے لاکھوں لوگ رائیونڈ پہنچے ۔ ایک اندازے کے مطابق 5 لاکھ سے زائد افراد جنازے میں شریک ہوئے جبکہ بعض لوگوں کے نزدیک تعداد اس سے بھی زیادہ تھی۔
حاجی عبدالوہاب مرحوم کی نماز جنازہ کے موقع پر سیکورٹی کے سخت انتظامات کئے گئے تھے ۔رائے ونڈ کے تمام داخلی و خارجی راستوں پر پولیس کی بھاری نفری تعینات کی گئی جبکہ اجتماع گاہ کو جانیوالے راستوں پر واک تھرو گیٹ اور کلوز سرکٹ کیمرے نصب کردئیے گئے۔
خبر رساں اداے این این آئی کے مطابق تبلیغی اجتماع پنڈال کے منبر پر حاجی عبدالوہاب کا جسد خاکی رکھا گیا،پنڈال میں پانچ لاکھ سے زائد افراد نماز عصر کے بعد ہی پہنچ گئے تھے ۔ ٹریفک کا رش زیادہ ہونے کی وجہ سے کارکنان کی بڑی تعداد جنازے میں شریک نہ ہوسکی ادھر ریلوئے اسٹیشن اور لاہو ر ہوائی اڈے پر بھی کارکنان کی بڑی تعداد موجود تھی۔لوگوں کی آمد کا سلسلہ نماز مغرب کے بعد بھی جاری رہا جس کی وجہ سے نماز جنازہ ڈیڑھ گھنٹہ تاخیر سے ادا کی گئی۔
ذرائع کا کہنا ہے کہ 5 لاکھ سے زائد افراد حاجی عبدالوہابؒ مرحوم کی نماز جنازہ میں شرکت کیلئے مرکزی اجتماع گاہ میں موجود تھے جبکہ لاکھوں لوگ سڑکوں اور ٹریفک جام میں پھنسے ہوئے تھے۔ نماز جنازہ میں شرکت کرنے والے بعض افراد کا کہنا ہے کہ یہ تبلیغی جماعت کے سالانہ اجتماع سے بھی بڑا اکٹھ تھا جس میں دنیا بھر سے لوگ شریک ہوئے۔
