پریس ریلیز راولپنڈی۔
پاکستان تحریک انصاف پنجاب کے نائب صدر انجینئر افتخار چوہدری نے اپنے بیان میں کہا ہے کہ تحریک انصاف آج بھی مشکلات کے باوجود عمران خان کے ویژن پر ڈٹی ہوئی ہے۔ انہوں نے واضح کیا کہ پارٹی میں کسی قسم کا انتشار نہیں ہے، البتہ جمہوری جماعتوں میں اختلاف رائے ایک فطری عمل ہے۔ انہوں نے پارٹی کے اندر اتحاد اور یکجہتی کو تحریک انصاف کی سب سے بڑی قوت قرار دیا۔
انجینئر افتخار چوہدری نے اس بات پر بھی زور دیا کہ پنجاب اس وقت ایک غیر یقینی اور پیچیدہ صورتحال سے گزر رہا ہے۔ انہوں نے آئی جی پنجاب پر تنقید کرتے ہوئے کہا کہ گزشتہ دو سالوں سے انہوں نے جنرل ڈائر کا روپ دھار رکھا ہے اور عوام کے لیے مشکلات پیدا کر رکھی ہیں۔ لیکن اس کے باوجود قوم کے جذبے اور عزم کو کمزور نہیں کیا جا سکا۔
انہوں نے کہا کہ تین دریاؤں کو عبور کرتے ہوئے، کشتیوں میں سوار ہو کر لوگ دھرنے میں شرکت کے لیے پہنچے، جو اس بات کا ثبوت ہے کہ عوام آج بھی عمران خان کے ساتھ کھڑے ہیں۔ انہوں نے مزید کہا کہ یہ عوامی تحریک صرف ایک سیاسی جدوجہد نہیں، بلکہ حق و انصاف کی سربلندی کی جنگ ہے، جس میں پوری قوم عمران خان کے پیغام کو دل سے قبول کر رہی ہے۔
انجینئر افتخار چوہدری نے اس بات کی بھی وضاحت کی کہ میڈیا میں بعض عناصر کی جانب سے پارٹی میں انتشار کی خبریں بے بنیاد اور حقیقت سے کوسوں دور ہیں۔ انہوں نے کہا کہ تحریک انصاف ایک منظم جماعت ہے جو عمران خان کے ویژن اور قیادت پر مکمل یقین رکھتی ہے۔
انہوں نے عوام سے اپیل کی کہ وہ اس نازک وقت میں صبر و تحمل کا مظاہرہ کریں اور تحریک انصاف کی جدوجہد میں بھرپور ساتھ دیں، کیونکہ یہ تحریک پاکستان کے مستقبل کے لیے ایک فیصلہ کن موڑ ثابت ہوگی۔
