ممبئی : جماعت اسلامی ہند مہاراشٹر کے امیر مولانا الیاس خان فلاحی نے جلگاؤں ٹرین حادثے میں سوگوار خاندانوں کے ساتھ تعزیت کا اظہار کیا اور حکومت پر زور دیا کہ وہ حفاظتی اقدامات میں اضافہ کرے۔
میڈیا کو جاری ایک بیان میں جماعت اسلامی ہند مہاراشٹر کے امیر نے کہا، ’’ہم مہاراشٹر کے جلگاؤں ضلع میں ہوئے المناک ٹرین حادثے سے بہت افسردہ ہیں، جہاں قیمتی جانیں ضائع ہوئیں اور کئی زخمی ہوئے۔ میں جماعت اسلامی ہند مہاراشٹر کی جانب سے سوگوار خاندانوں کے ساتھ دلی تعزیت کا اظہار کرتا ہوں اور دعا کرتا ہوں کہ اللہ تعالیٰ انہیں اس مشکل وقت میں صبر جمیل عطا فرمائے۔ ہم زخمیوں کی جلد صحت یابی کے لئے بھی دعا گو ہیں۔ ہم متاثرین کے اہل خانہ کے لئے مہاراشٹر حکومت کی طرف سے اعلان کردہ معاوضے کی ستائش کرتے ہیں اور حکام پر زور دیتے ہیں کہ وہ امدادی کوششوں میں تیزی لائیں۔ اطلاعات کے مطابق لکھنؤ- ممبئی پشپک ایکسپریس کی ایک بوگی میں چنگاریوں اور دھوئیں کی وجہ سے مسافروں میں خوف و ہراس پھیل گیا جس کے بعد ٹرین کی ہنگامی زنجیر کھینچنے پر مجبور ہونا پڑا۔ ٹرین ماہے جی اور پردھاڈے اسٹیشنوں کے درمیان رک گئی۔ آگ لگنے کے خوف سے کچھ مسافر پٹریوں پر کود گئے، جہاں انہیں بنگلورو سے دہلی جانے والی کرناٹک ایکسپریس نے کچل دیا‘‘۔
مولانا الیاس فلاحی نے کہا کہ ’’یہ افسوسناک واقعہ بحران کے لمحات میں پرسکون رہنے کی اہمیت کو اجاگر کرتا ہے۔ گھبراہٹ اکثر المناک نتائج کا باعث بنتی ہے ، جیسا کہ اس واقعے میں دیکھا گیا ہے ۔ ہم اپنے ہم وطنوں پر زور دیتے ہیں کہ وہ ہنگامی حالات میں کسی نتیجے پر پہنچنے سے گریز کریں اور حکام اور تربیت یافتہ اہلکاروں کی رہنمائی پر عمل کریں۔ اس کے ساتھ ہی ہم حکومت پر زور دیتے ہیں کہ وہ ٹرینوں میں مسافروں کی حفاظت کو بڑھانے کے لئے فوری اقدامات کرے۔ ہم تمام ٹرینوں میں پبلک ایڈریس سسٹم کی تنصیب کی پرزور سفارش کرتے ہیں ، جیسا کہ ہوائی جہاز میں ہوتا ہے، تاکہ ہنگامی حالات کے دوران واضح مواصلات کو یقینی بنایا جاسکے۔ مزید برآں، کوچز میں سی سی ٹی وی کیمروں کی تنصیب سے ایسے حالات کی موثر نگرانی اور انتظام کرنے میں مدد ملے گی۔ وزارت ریلوے کے پاس مناسب تعداد میں ٹرینوں کی دیکھ بھال کرنے والے سیفٹی مارشل ہونے چاہئیں۔ ان اقدامات سے نہ صرف غلط معلومات کے پھیلاؤ کو روکا جاسکے گا بلکہ مسافروں میں تحفظ کا احساس بھی پیدا ہوگا۔ حکومت کو حالیہ برسوں میں بڑے حادثات کی بڑھتی ہوئی تعداد کو دیکھتے ہوئے ٹرینوں میں حفاظتی اقدامات کو بڑھانے کے لئے ایک نیا مطالعہ کرنا چاہئے‘‘۔
جاری کردہ:
ارشد شیخ
سکریٹری، شعبہ میڈیا جماعت اسلامی ہند، مہاراشٹر
ایڈریس: دارالفیض، ساتویں منزل، اقبال کمالی جنکشن، 4 سانکلی اسٹریٹ
مدن پورہ، بائیکلہ (مغرب) ممبئی – 400008
موبائل: 9717424918
